Aysel, musiqi ilə uşaqlıqdan məşğulsan?

Bəli, uşaqliqdan musiqiyə meyilliyim var idi. 4 yaşimdan oxuyuram. Musiqini çox sevirəm, musiqi mənim həyatımdır.
Hansı nailiyyətlərlərin olub? (bu haqda mümkün qədər ətrfalı)
Mən bəstəkar Əvsər Cavanşirovun rəhbərlik etdiyi "Bənovşə" uşaq ansamblında xor və solo mahnılar ifa etməyə başlamişam. Sonradan "Sehrli aləm" cəmiyyəti "Pöhre" bədii özfəaliyyət kollektivlərinin baxış müsabiqəsində ifa etdiyim ingilis ve ispan mahnilarına görə laureat adını qazanmışam. Rəşid Behbudov adina 2 nömrəli musiqi məktəbinin fortepiano şöbəsini fərqlənmə ilə qurtarmışam. Orada da xorun solisti kimi çıxış etmişəm. Bir il Amerika Birləşmiş Ştatlarında təhsil almışam. Həmin ölkədə müxtəlif müsabiqələrdə iştirak etmişəm və üç müsabiqədə birinci yerə layiq görülmüşəm Vətənə üç qızıl medalla qayıtmışam. Yeni Ulduz 4 müsabiqəsinin iştirakçısı olmuşam. Ondan sonra isə “Tələbə Baharı müsabiqəsində” birinci yerə layiq görülmüşəm. Nəhayət ki, tale məni Eurovision müsabiqəsinə gətirib çıxartdı.

Musiqidən başqa hansı maraqların var? Nə ilə məşğul olmağı xoşlayırsan? (əyləncə, hobbi)

Anam elm adamı, alim kimi həmişə axtarışda olub. Ona görə uşaqlıqdan incəsənətə həvəsimi görüb, oxumağıma, rəsm çəkməyimə dəstək verib. Təbii ki, o həm də sağlam böyüməyimi istəyirdi. Bəlkə bu səbəbdən dolayı mənim balet, gimnastika, üzgüçülük və handbolla məşğul olmağım anamın istəyinin ifadəsi idi. Təbii ki, uşaq da özünü axtarıb tapmağa çalışır. Mən özümü musiqidə tapmışam. Elə hobbim də musiqidir.

Bir çoxları səni R&B ifaçısı kimi tanıyır? Başqa hansı üslubları xoşlayırsan? Hansıları ifa edirsən?

Özümü yalnız R&B ifaçısı adlandırmazdım. Çünki bir çox janrlarda ifa edirəm və hər dəfə çalışıram ki, özümü təzə janrda sınayım. Soul, Rock, Pop, Blues, Jazz və Klassik janrları çox sevirəm. Və əlbəttə, Azərbaycan musiqisini sevərək ifa edirəm.
Bir neçə gün bundan öncəki Aysellə Eurovision 2009 Mahnı Müsabiqəsinin Azərbaycan siması olan Aysel Teymurzadə arasında hansı fərqlər var?
Əlbətdə fərqi hiss edirəm. Bu məndə məhsuliyyət hissini qat-qat artırıb. O vaxtdan bəri öz üzərimdə daha ciddi səylə işləyirəm.

Hal-hazırda müsabiqədəki çıxışına necə hazırlaşırsan?

Vokal, rəqs dərsləri alıram. İmijim üzərində işləyirəm. Amma mahnı bəlli olan gündən daha dəqiq obraz üzərində çalışacağıq.

Ümumiyyətlə, necə düşünürsən, milli seçimlərdə səni digər namizədlərdən fərqləndirən nə idi? Nəyə görə məhz səni seçdilər?

Mənə belə gəlir ki, bu sualı Siz münsiflər heyətinə ünvanlasanız, daha yaxşı olar. (gülür)

Səncə, bu müsabiqədə uğurun resepti nədir?

Ən əsası mahnı yaddaqalan olmalıdır. Bundan başqa ifaçı öz istedadı ilə böyük seyirci auditoriyasını az qala valeh etməyi bacarmalıdır.

Şəxsi həyatın haqda nə deyə bilərsən? Gənc, gözəl xanım olaraq yəgin ki, pərəstişkarların bir az da artıb. Müsabiqədən sonra ümumiyyətlə, sayı-hesabı olmayacaq. Buna münasibətin necədir?

Sözsüz ki, pərəstişkarların sayı artıb. Arzu edərdim ki, onlar, ilk növbədə, ifamın və yaradıcılıq fəaliyyətimin pərəstişkarları olsunlar.

Megapolis.tk saytının qonaqlarına və ümumiyyətlə sənin bu müsabiqədəki iştirakını dəstəkləyən insanlara nə deyə bilərsən?

Hər kəsə dərin minnatdarlığımı bildirirəm. Sizə deyə bilərəm ki, ölkəmizin bu müsabiqədə ən yüksək zirvəyə sahib olması üçün əlimdən gələni edəcəyəm. Sizlərdənsə yeganə istəyim dəstəyinizdir!