Uranla Musahibe - 3 March 2009

S: Bir çox rapperlər öz tracklərində İslam dininə aid mövzuya toxunurlar. Uranın da "Ruhlar" adlı tracki bunlardan biridir. Gələcəkdə Urandan dini mövzuda track gözlənilirmi?

U: Ruhlar tracki İslam mövzusunda deyil, lakin bu ümumi təkallahlıq ideologiyası əsasında yazılan, əxlaq və sosial problemlərdən bəhs edən fantastik, dini-fəlsəfi mövzudur. Tam dini əsaslara dayaqlanan və dini çağırış olan track yazmaq fikrində deyiləm. Çünki mənim aləmimdə din və rap bir-birinə əksdir. "Mənasız Şeylər" adlı albomunda fantastik, dini-fəlsəfi mövzuda "Şeytanla görüş" adlı track yer alacaq.

S: Konsert vermək fikrin varmı? Varsa nə vaxt?

U: Konsert vermək fikrim var, xüsusən Bakı, Sumqayıt və Gəncə şəhərlərində. Vaxtı dəqiq deyə bilmərəm. İnşAllah, albom çıxarıldığı ərəfədə.

S: Yeni çıxacaq olan "Mənasız Şeylər" albomu barəsində nə deyə bilərsən? Ümumiyyətlə albomun samplerinin hazırlanması nə vaxta planlaşdırılıb?

U: "Mənasız Şeylər" albomu 3 il ərzində uzun fasilələrlə hazırlanıb. Tracklist dəfələrlə dəyişdirilib. İstəməzdim ki bu albom "Hörmətlə, Uran" albomunun təkrarı olsun. Lakin mən inanıram ki, "Mənasız Şeylər" uğura məhkumdu. Albomda Elnino və Virtualdan başqa, Jizza, SoundLab və İsmayıl adlı beatmakerin produserliyi altında yaranan tracklər yer alıb. Bu albomda özümün produserliyi ilə yazılan ilk tracklər gözlənilir. Onlardan biri artıq kütlə tərəfindən eşidilən "Körpələrə pis nümunə" trackidir. Albom, İnşAllah nə gec, nə də tez, məhz vaxtında çıxır. Azərbaycan rapinin tanınmış və tanınmaqda olan isimlərinin çoxu albom buraxdı. Növbə mənimdir.

S: Rap mətnləri yazma bacarığının olduğunu neçə yaşında hiss etmisən?

U: İlk şer nümunəm 1994-cü ildə, ilk rap nümunə isə 2000-ci il mart ayının 9-na aiddir. 2000-ci ilin oktyabr ayından ancaq rap janrında yazmağa başladım. Yəqin həmin vaxtlar bu bacarığı özümdə hiss etdim.

S: Rapper olmaq istəyənlərə, ümumiyyətlə gənc rapperlərə məsləhətin?

U: Rapper olmaq istəyənlərə bunu deyərdim. Dünya rapinin əfsanəvi, sayılıb-sevilən bütün isimləri kasıb təbəqədən çıxmışlar. Söhbət ondadır ki, həyatın əsl üzün bu təbəqənin nümayəndələri tez və qabarıq görür, bu da rap janrının ideoloji prinsiplərinə görə cəmiyyətin iyrənc üzünə, ədalətsizliyə qarşı daxildə yaranan etirazı alovlandırır. Dediklərim dünya rap təcrübəsindən götürülmüşdür. Gənc rapperlərə məsləhətim, təəsüratsız heç nə yazmayın, bu işə yaradıcılıq kimi yanaşın. Hansı mövzuda yazırsınızsa, yazın, şəxsi işinizdi. Amma hər kəlməni, hər cümləni əsaslandırın, yazdığınıza cavabdeh olun. Bu gün dindən yazıb, sabah bara və kluba intim tələbatlarınızı ödəmək üçün daxil olmayın. Yaşadığınızı yazın ki, yazdığınızı oxuyarkən yaşayasınız. Hamıya uğurlar.

S: Uranın birinci tracki hansı olub?

U: İlk hazır yazılmış track hələ "Uran" qrupunun mövcud olduğu vaxtlarda olub. Track "Baş Ağrıları" adlanırdı (2003). Hal-hazırda özümdən başqa heç kəsdə bu track yoxdu.

S: Sənin rapə gəlməyin şəxsi həyatında problemlər yaratdımı? Yəni ailədə, dostların arasında bunun əleyhinə olanlar var idi?

U: İlk dinləyicilərim yaxın dostlarım Vasif və sonradan mənimlə "Uran" qrupunda çalışan Nick S. olmuşdur. Tanışlar hərə bir cür baxırdı. Məni isə bu heç vaxt maraqlandırmayıb, indiki kimi. Ailəmdə məndən kiçik qardaşım Kənanın xəbəri olub, valideynlərim isə ilk efirdə çıxışım zamanı xəbər tutublar (2004). Əvvəlcə elə də normal qarşılanmamışdı.Hətta qohumlarımdan tənqid edənlər də olub. Lakin işin yaxşı (uğurlu) nəticəsi hamını fikrindən döndərə bildi.

S: Uran hansı rapi daha çox bəyənir - fransız, amerikan, rus və s.?

U: Amerika, Fransız, Rus və Türk rap nümunələrinə qulaq asıram. Ən çox, sözsüz ki, Amerika rapinə.

S: Gələcəyə açıqlaya biləcəyin hansısa planların var? "Mənasız Şeylərdən başqa.

U: Yaradıcılıq planlarım boldu; sayca 3-cü və 4-cü albomla bağlı cızmaqaralar (hətta bəzi hazır tracklər), rapin Azərbaycan mədəniyyəti (ədəbiyyatı) nümunələri sırasına qatılması yolunda işlər, "Rapin Konsepsiyası" və "Mənim Fəlsəfəm" adlı kitablar. Azərbaycan rapinin dünya rapinə inteqrasiyası yolunda görüləcək işlər.

S: Tracklərinin sözlərini əsasən nə qədər vaxta yazırsan?

U: Adətən sözlərin yazılması 1-4 saat ərzində olur. Rekord nəticəm 20 dəqiqə olub. Amma yazmağa qədərki hazırlıq dövrü (mövzunun araşdırılması) bir ilə qədər uzana bilər. Amma özümə heç vaxt belə işdə məhdudiyyət qoymuram.

S: Öz tracklərindən hansını daha çox bəyənirsən?

U: Hər sətrim, hər mövzum, hər trackim mənim təfəkkürümün məhsuludur. Dinləyici onlara fərq qoya bilər. Mənə görə az və ya çox bəyənmə söhbəti yoxdu

S: Ən çox kimin əsərlərini oxuyursan?

U: Vidadi Babanlı, İlyas Əfəndiyev, Cəmşid Əmirov, Çingiz Abdullayev, Çingiz Aytımatov, Teodor Drayzer, Mark Tven, Aleksandr Düma, Artur Konan Doyl, Jorj Simenon, Ceyms Heydli Çeyz, Aqata Kristi... bunlar yadımda qalanlardı. Ən çox Çingiz Abdullayevin kitablarını oxumuşam. Sonuncu oxuduğum kitab elmi-fəlsəfi kitab olub, Oşo "Yaradıcılıq". Çoxdandır ki kitab oxumağı vərdiş kimi qəbul etmişəm.

S: Bu yaxınlarda klip gözlənilirmi? Ümumiyyətlə, Da Streetz Pro'nun klip planı var? Varsa hansı trackə?

U: "Da Streetz" Azərbaycanın ilk Rap lable'idir. "Mənasız Şeylər" bu lable'in dəstəyi ilə işıq üzü görəcək... Klipə qalsa, bu işlərlə əlaqəli planların tərtibatı ilə produserim Master T məşğuldur. Amma təkcə bunu deyə bilərəm ki, klip olacaq.

S: Yazdığın mövzularda olan hadisələr adi həyatdan götürülür yoxsa bu sənin fantaziyanın məhsuludur?

U: Süjet xəttli mövzular adətən həyatda gördüyüm, müşahidə etdiyim, eşidim araşdırdığım hadisələrə əlavə olunan bədii fantaziyam nəticəsində yaranır. Amma həmişə yox. Məsələn, "Kor zabit" , "Bloknot", "Məhəbbət, İncəsənət, Ölüm" trackləri real həyatdan götürmədiyim mövzulardır. Burada təxəyyül və bədii fantaziyam çalışıb ancaq.

S: Meyxanayla aran necədi?

U: Meyxana ilə aram əladı. Başqa cür məncə ola da bilməz. Xüsusən meyxana deyişmələrinə həvəslə qulaq asıram.

S: Uran üçün dünya rapinin əfsanəsi kimdir?

U: Mənim üçün dünya rapinin əfsanəsi Tupacdır.

S: Caspian Clan'dan başqa Azərbaycan rapində kimləri bəyənirsən?

U: Anar Nağılbazı, Həkimi, H.O.S.T Alliance'ı, Rap Out Clanı, Timonu, Qurdu, Hilal Demonu dinləyirəm.

S: Xarici rapperlərlə işbirliyi gözlənilirmi?

U: Xarici rapperlərlə duetlər gözlənilir, siyahıda türk, gürcü, rus və fransız rapperləridir. Kimlərdi? Hazır olar, bilərsiniz.

Sual verən hər kəsə dərin təşəkkürümü bildirirəm. Cavabların gecikdirilməsi forumun rəhbərliyinin deyil, mənim günahımdır. Unutmayın, nə qədər Siz varsız, bir o qədər də Mən Də Varam.

Hörmətlə, Uran a.k.a da Vinci